前日趁唔係咩特別節日，剛踏入初夏嘅埃及未算好熱，就同意佬去咗開羅舊城區行吓。我哋除左去行仲多人過花園街嘅Khan el Khalili 哈利利市集外，仲去咗參觀Salah El-Din薩拉丁大城。
埃及星期五係周末，所以呢日都有幾班小學團嚟參觀。除左參觀世界遺產令小朋友們大開眼界外，我同意佬更加成為佢地嘅目標😳
男孩子崩崩跳的湧到意佬面前要求影合照，女孩子呢就怕怕羞羞，吞吞吐吐咁問我：「Hello, can you take a photo with us please?」起初我哋唔多想理佢哋，因為行程趕路上又大風，心諗影得相嚟乜都睇唔到。後來每行十步就有三五個豆釘嗡埋嚟，跟本你唔應承同佢哋影一張佢哋係唔會罷休，望住佢哋好奇嘅眼神，我不禁問：「點解你哋想同我哋影相？」
小朋友嘅答案令我無法再拒絕佢哋嘅要求。
「只有呢度我先能夠見到喺第二個國家嚟嘅人。」
聽後有點心酸，大概觸動了我嘅憐憫之心。曾係四大文明古國之一，今日居然因爲恐襲、空難、炸彈、槍擊，弄得整個國家人心惶惶，冇人再夠膽嚟呢個地方。事實呢度嘅旅遊業近每況愈下，旅遊業已蕭條得大部分景點都只有本地埃及人參觀；每隔幾個月就一次嘅零星恐怖襲擊更趕走剩下的三幾個背包客。可是小孩子係無辜的，佢哋同樣都想用自己的雙眼看看呢一個世界，佢哋都想同我哋一樣買張機票，伸手摸摸別處的花花草草。小朋友們心水清，知道自己跟本唔會有出國機會，國家旅遊業收入插水式地下降，以致今時今日呢度大眾國民嘅經濟條件，窮一生之力工作都難以有錢剩去買一張飛機票。
簡單的一問一答，暗暗贈了自己幾隻字：
「幸福不是必然。」
雖然佢哋不斷喺我哋前面圍圈兼loop住「同我影張相」都幾耳仔轟炸，但我同意佬最終都前前後後幫班豆釘影咗四五十張相。臨走前誇到有對夫婦要求我哋抱住佢哋2個月大嘅BB女影相，話要返屋企曬出嚟裱起佢😅第日我紅過Do姐時記得揾我簽返個名～哈
我同意佬會心微笑，冇出過錢，但既然影幾張相就可為呢班有心無力出走看世界嘅人帶來歡笑，何樂而不為？😊
#童真可貴 #助人為樂 #出走埃及記2
#HelloPhoto #世界幾時先可以和平
Search